देश

पहिरोले अरुण नदी थुनियो

विराटनगर, ७ असार-संखुवासभाको मकालु गाउँपालिका–२ ओयाङ्गमा गएको पहिरोले आशिंक रुपमा अरुण नदी थुनिएको छ । मकालु गाउँपालिकाको २ र ५ को सीमानामा आज बिहान करिब ६ सय मिटर माथिबाट खसेको पहिरोले अरुण नदी थुनिँदा ताल बनेको हो ।

पहिरोले मकालु गाउँपालिका–२ का दुई घर परिवार विस्थापित भएका छन् । विस्थापित हुनेमा प्रकाश राई र हिरालाल राईको परिवार रहेको र उनीहरुलाई सुरक्षित स्थानमा सारिएको जिल्ला प्रहरी कार्यालय संखुवासभाले जनाएको छ ।

जिल्ला प्रहरी कार्यालय संखुवासभाका प्रहरी नायब उपरीक्षक नवराज मल्लका नुमार करिब ६ सय मिटर माथिबाट झरेको पहिरोले अरुण नदी थुनिएर ड्याम बनेको छ ।

उनले ड्याम बनेपनि पानीको बहाब माथिबाट बग्न भने थालिसकेको बताए । प्रहरी नायब उपरीक्षक मल्लले पहिरोको विस्तृत जानकारी आई नसकेको र पहिरोको जोखिममा रहेका प्रकाश राई र हिरालाल राईको परिवारलाई सुरक्षित स्थानमा सारिएको जानकारी दिए ।

पहिरोले बनाएको ड्याम एकै पटक पानीको बहाबले खोल्न सक्ने आशंकामा अरुण नदी आसपास बस्ती रहेको अरुण तेश्रो आयोजनाको पावरहाउस स्थल पुखुवा क्षेत्र र हेलुवाबेसी, चेवाबेसी, मनकामना, पिलुवा लगायतका क्षेत्रका स्थानीयलाई अरुण नदी आसपास नजान र सर्तक भएर बस्न आग्रह समेत गरिएको छ । पहिरो खसेको स्थान सदरमुकाम खाँदबारीबाट १ दिनको पैदल दुरीमा रहेको छ ।

Featured