देश

काभ्रेपलाञ्चोक कोरोनामुक्त

काभ्रेपलाञ्चोक, ७ असार-कोरोना सङ्क्रमित सबै अस्पतालबाट डिस्चार्ज भएर घर फर्किएसँगै काभ्रेपलाञ्चोक कोरोनामुक्त भएको छ । काभ्रेपलाञ्चोकका सङ्क्रमित ६ जना कोरोनामुक्त भएर अस्पतालबाट घर फर्किएका हुन् । सङ्क्रमितहरू २ सातादेखि काठमाडौं मेडिकल कलेज दुवाकोटमा उपचारत रहेका थिए ।

सङ्क्रमितको स्वास्थ्यमा क्रमिक सुधार आएपछि पछिल्लो स्वाब परीक्षणको रिपोर्टमा कारोना भाइरस नेगेटिभ देखिएपछि ६ जना नै शुक्रबार साँझ घर फर्किएको कोभिड-१९ रोकथाम तथा नियन्त्रण, जिल्ला कमान्ड पोष्टले जनाएको छ । यसपछि काभ्रेपलाञ्चोक कोरोना भाइरसमुक्त भएको हो । पोष्टका सदस्यसचिव एवं जिल्ला स्वास्थ्य कार्यालय प्रमुख डा. नरेन्द्र झाका अनुसार घर फर्किएकालाई होम क्वारेन्टिनमा बसाइएको छ ।

सङ्क्रमितमध्ये २ महिला हुन् । रोशी गाउँपालिकाका ३, पाँचखाल नगरपालिकाका १ र पनौती नपाका १ तथा काभ्रेपलाञ्चोक घर भई १ ललितपुर र १ काठमाडौं बस्नेमा कोरोना सङ्क्रमण भएको थियो । सङ्क्रमितमध्ये ४ जना भारतबाट फर्किएका नागरिक रहेको पोष्टले जनाएको थियो ।

डिस्चार्ज भई होम क्वारेन्टानमा बसेकाको स्थानीय स्वास्थ्यकर्मीबाट निगरानी गरिने झाले बताए ।   सङ्क्रमितको स्वास्थ्य सुरक्षामा विशेष निगरानी भइरहेको झाले बताए । पोष्टका अनुसार हाल जिल्लास्थित विभिन्न क्वारेन्टानमा भारतलगायत विदेशबाट फर्किएका २२ महिलासहित ८७ जना बसेका छन् ।

यसअघि गत १ जेठमा राति काभ्रेपलाञ्चोकको धुलिखेल अस्पतालमा उपचारका क्रममा कोरोना भाइरसका कारण सिन्धुपाल्चोकको बाह्रबिसे नगरपालिका-९ राम्चेकी २९ वर्षीया सुत्केरी महिलाको मृत्यु भएको थियो । कोरोना भाइरसबाट मृत्यु हुने ती महिला नेपालमा पहिलो घटना हो । रासस 

Featured