देश

शनिबार उपत्यकाका ८ जनासहित देशभर ३३१ जनामा कोरोना संक्रमण पुष्टि

काठमाडौं, ६ असार-शनिबार उपत्यकाका ८ जनासहित ३३१ जनामा कोरोना भाइरस संक्रमण पुष्टि भएको छ । स्वास्थ्य मन्त्रालयको नियमित पत्रकार सम्मेलनमा भक्तपुरका ७ जना र काठमाडौंका १ जनासहित देशभर ३३१ जनामा कोरोना भाइरस संक्रमण देखिएको प्रवक्ता डा. जागेश्वर गौतमले जानकारी दिए ।

आज थपिएका ४९ महिला र २८२ जना पुरुष रहेका छन् । योसँगै नेपालमा कोरोना संक्रमितको संख्या ८ हजार ६०५ पुगेको छ । जसमध्ये ७५६ जना महिला छन् भने ७ हजार ८४९ पुरुष रहेका छन् ।

२४ घण्टाको अवधिमा १७६ जना कोरोना भाइरस संक्रमणबाट निको भएका छन् । जसमध्ये १८ जना महिला रहेका छन् भने अन्य पुरुष रहेका छन् । अहिलेसम्म १ हजार ५७८ जनाले कोरोना भाइरस संक्रमणलाई जितेका छन् । स्वास्थ्य मन्त्रालयको तथ्यांकअनुसार अहिलेसम्म १४१ जना महिला र १ हजार ४३७ जना पुरुषले कोरोनालाई परास्त पारेका छन् ।

स्वास्थ्य मन्त्रालयको पछिल्लो विवरणअनुसार १ लाख ६९ हजार ९६५ नमुनाको पीसीआर विधिबाट परीक्षण गरिएको छ । त्यस्तै, २४ घण्टाको अवधिमा पीसीआर परीक्षणको दायरा बढाउँदै ७ हजार ४१६ नुमनाको परीक्षण गरिएको छ ।

Featured