देश

आज काठमाडौंसहित देशभर ४२६ जनामा कोरोना संक्रमण पुष्टि

काठमाडौं, ३ असार-काठमाडौंका सहित देशका विभिन्न स्थानमा आज ४२६ जना नयाँ संक्रमित थपिएका छन् । स्वास्थ्य मन्त्रालयको नियमित पत्रकार सम्मलेनमा मन्त्रालयका प्रवक्ता डा. जागेश्वर गौतमले देशभरका विभिन्न प्रयोगशालामा गरिएको परीक्षणमा ८८ महिला र ३३८ पुरुष गरी ४२६ जनामा कोरोना भाइरस संक्रमण पुष्टि भएको जानकारी दिए ।

उनका अनुसार देशभर संक्रमितको संख्या ८ हजार २७४ पुगेको छ । जसमध्ये ७७७ महिला छन् भने पुरुष ७ हजार ५६७ जना रहका छन् । संक्रमण फैलिएको जिल्लाको संख्या ७४ पुगेको छ । आज पनि काठमाडौं निवासी २ महिला र १ पुरुष कोरोना भाइरस संक्रमण देखिएको उनले बताए ।

पछिल्लो २४ घण्टाको अवधिमा २१६ डिस्चार्ज भएका छन् । जसमध्ये ९ जना महिला र २०७ जना पुरुष रहेका छन् । योसहित डिस्चार्ज हुनेको संख्या १ हजार ४०२ पुगेको प्रवक्ता डा. गौतमले जानकारी दिए ।

स्वास्थ्य मन्त्रालयको शुक्रबारसम्मको विवरणअनुसार १ लाख ६१ हजार ७४९ नमुनाको पीसीआर विधिबाट परीक्षण गरिएको छ । २४ घण्टाको अवधिमा ६ हजार २३१ नमुनाको पीसीआर विधिबाट परीक्षण गरिएको छ ।

२४ घण्टाको विधिमा ४ हजार ३९९ जनाको आरडीटी विधिबाट परीक्षण गरिएको छ । १ लाख ९ हजार ४६१ जना क्वारेन्टाइनमा छन् भने ६ हजार ८५० जना आइसोलेसनमा रहेको स्वास्थ्य मन्त्रालयले जनाएको छ ।

Featured