देश राजनीति

एमसीसी सम्झाैता पढेको कोही भेटिनँ : प्रधानमन्त्री ओली

काठमाडौं, ४ असार-प्रधानमन्त्री केपी शर्मा ओलीले मिलेनियम च्यालेन्ज कर्पाेरेसन (एमसीसी) काे सम्झौता नै नपढी हल्लाको पछाडि लागेको बताएका छन् । राष्ट्रियसभामा सांसदहरूले उठाएका प्रश्नको जवाफ दिँदै उनले भने, ‘मान्छेहरूले पढे हुन्थ्यो नि लहैलहैमा लागेर हल्ला गर्नुभन्दा । देशको विकास हुन्छ भन्ने चिन्ता लागेर हो कि हल्लाको पछाडि लागेका । हल्ला गर्नुभन्दा पढे हुने नि ।’

प्रधानमन्त्री ओलीले जवाफ दिँदै भने ‘अहिले केही केहीले हल्ला चलाएका छन् । पढ्न अल्छी लाग्छ कि के हो ? कमसेकम एमसीसीको सम्झौता पढे हुन्थ्यो नि । मैले त एमसीसी सम्झौता पढेको मान्छे त्यति देखिनँ । खोजेर एक पटक पढे हुन्थ्यो ।’

मानिसहरू पढ्नुभन्दा हल्लाको भरमा कुद्ने । जसरी पनि विरोध गर्न पाए खुसी हुने जमात तयार भएको उनकाे भनाइ थियाे । उनले भने, ‘मान्छेहरू खुट्टाले टेकेर हिँड्नभन्दा टाउकाेले टेकेर हिँड्न थालेका छन् । खुट्टाले टेकेर हिँड्नुपर्छ । यो भनेको ठीक कुरा ठीक तरिकाले गर्ने र बाेल्ने हाे । लहैलहैमा लागेर हिँड्नु राम्राे होइन । यहाँ ठीक छ, यहाँ बेठीक छ भन्नुचाहिँ एक कुरा हो । तर, पढ्दै नपढी हल्ला गर्नु गतल हो ।’

एमसीसी अहिले संसददेखि सडकसम्मको विषय बनेको उनले बताए । ‘कागले कान लग्यो भनेर दगुर्नुभन्दा पहिला कान छाम्नुपर्छ ।  अझ दुखेको छैन भने कान लगेको रहेनछ भनेर बुझ्नुपर्छ नि । दुख्यो दुखेन वास्ता नगर्ने । कान नछामी कुद्ने प्रवृत्ति अचम्मको छ,’ उनले भने ।

Featured