विदेश

डब्लूएचओद्वारा हाइड्रोक्सिक्लोरोक्विनको परीक्षणमा रोक

एजेन्सी, असार ४-विश्व स्वास्थ्य संगठन (डब्लूएचओ) ले कोरोना भाइरस संक्रमितको उपचारका लागि मलेरियाविरुद्धको औषधि हाइड्रोक्सिक्लोरोक्विनको परीक्षणमा पुनः रोक लगाएको छ ।

यसअघि द लानसेट जर्नलमा प्रकाशित अनुसन्धान प्रतिवेदनमा हाइड्रोक्सिक्लोरोक्विन कोभिड–१९ का बिरामीका लागि फाइदाजनक नरहेको र यसले मृत्युको जोखिम बढाउने र गम्भीर खालको मुटुसम्बन्धी समस्या हुने देखिएको उल्लेख गरिएपछि डब्लूएचओले मानवीय परीक्षणमा रोक लगाएको थियो ।

तर सो अनुसन्धान प्रतिवेदनको तथ्यांकमा कमजोरी देखिएको भन्दै लानसेटले अनुसन्धान प्रतिवेदन फिर्ता लिएपछि डब्लूएचओले पुनः हाइड्रोक्सिक्लोरोक्विनको परीक्षण सुरु गरेको थियो ।

पुनः डब्लूएचओले विभिन्न देशमा गरिएका प्रयोगमा कोरोना भाइरसका संक्रमितको उपचारमा कुनै सहयोग वा फाइदा नपुगेको देखिएको भन्दै हाइड्रोक्सिक्लाेरोक्विनको परीक्षणमा रोक लगाएको जनाएको छ ।

यसअघि सोमबार अमेरिकाको फुड एण्ड ड्रग एड्मिनिस्ट्रेसन (एफडीए) ले हाइड्रोक्सिक्लोरोक्विनलाई कोरोना भाइरसका संक्रमितको आपतकालीन उपचारमा प्रयोग गर्ने औषधिको सूचीबाट हटाएको थियो ।

Featured