देश

२ घण्टा छाङ्ग्रुमा बिताएर फर्के प्रधानसेनापति र सशस्त्रका आईजीपी

काठमाडौं, ३ असार-दार्चुलाको छाङ्ग्रु निरीक्षण गरेर नेपाली सेनाका प्रधानसेनापति पूर्णचन्द्र थापा र सशस्त्र प्रहरी बलका महानिरीक्षक (आईजीपी) शैलेन्द्र खनाल फर्किएका छन् ।

३१ वैशाखमा सशस्त्र प्रहरी बलले स्थापना गरेको आउट बोर्डर पोस्ट (बीओपी) र नेपाली सेनाले जिम्मा पाएको दार्चुला तिङ्कर सडक खण्डको निरीक्षण गरेर उनीहरू फर्किएका हुन् ।

उनीहरूसँगै सुदूरपश्चिम प्रदेश प्रहरी प्रमुख (डीआईजी) उत्तमराज सुवेदीसमेत छाङ्ग्रु पुगेका थिए । आईजीपी खनाल, प्रधानसेनापति थापा र आफूले छाङ्ग्रुको अवलोकनमा करिब २ घण्टा बिताएको डीआईजी सुवेदीले बताए ।

‘हामीले केही दिनअघि सशस्त्र प्रहरी बलले स्थापना गरेको बीओपीको अनुगमन गर्‍याैँ, बीओपीभन्दा करिब ६–७ किलोमिटर उत्तरमा रहेको सीतापुल प्रहरीचौकीमाथि पनि हवाई अनुगमन गरेर फर्कियौँ,’ सुवेदीले भने ।

सशस्त्र प्रहरीका अनुसार छाङ्ग्रुमा अब सशस्त्र प्रहरीको गुल्म बस्ने र तिङ्करको कौवामा बीओपी राखिनेछ । त्यसरी नै दार्चुलाको ५० नम्बर गणलाई गुल्ममा परिवर्तन गरिनेछ । साेही भवनकाे आजै आईजीपी खनालले उद्घाटन गरेका छन् ।

Featured