देश

सडकको विषयलाई लिएर उपभोक्ता समिति अध्यक्षमाथि कुटपिट 

विराटनगर, २९ जेठ-विराटनगरमा निर्माणाधिन सडकको सिमाना टुंगो लगाउने विषयमा विवाद हुँदा सडक उपभोक्ता समितिका अध्यक्षमाथि कुटपिट भएको छ । विराटनगर-११ पंचमुखी चोकस्थित धरणीधर मार्गमा निर्माण गर्न लागिएको सडक र नालाको सिमानाका बिषयमा विवाद हुँदा निर्माण समितिकी अध्यक्ष सञ्जु साहमाथि कुटपिट भएको हो ।

कुटपिटबाट घाइते साहको विराटनगरस्थित कोशी अस्पतालको इमर्जेन्सी वार्डमा उपचार भइरहेको छ । कुटपिटबाट घाइते उनी सामाजिक अभियन्ता र महिला अधिकारकर्मीसमेत हुन् । शाहको दुवै हात, छाती र टाउकोमा चोट लागेको जनाइएको छ ।

आफ्नै घरमा बसिरहेको अवस्थामा दिउँसो १ बजे ६ जना पुरुष र १ महिलासहित एउटा निजी गाडीमा आएको हतियारधारी समूहले आफूलाई नियन्त्रणमा लिएर कुटपीट गरेको साहले बताइन् ।

नियन्त्रणमा लिएर आफूलाई खुकुरी प्रहार गर्न खोजिए पनि घरमा भएका नानीहरूले रुन कराउन थालेपछि आक्रमण गर्ने समूह भागेको उनको दाबी छ । सो बिषयमा जानकारी दिँदै विराटनगर–११ का वडाध्यक्ष तीथेन्द्र न्यौपानेले निर्माण गर्न लागिएको बाटोको सिमाना कति फिट राख्ने बिषयमा स्थानीय र उपभोक्ता समितिबीच विवाद भएको बताए ।

विवाद भएपछि आफूसमेत त्यहाँ पुगेको र दुवै पक्षबीच सहजीकरण गरेर गएपछि घटना भएको बताए । उनले स्थानीय र उपभोक्ता समितिबीच सिमानाका विषयमा विवाद भए पनि निर्माणाधिन सडकसँग असम्बन्धित ब्यक्तिसमेत सहभागी भएर कुटपिट भएको बताए ।

उता वडा प्रहरी कार्यालय विराटनगर (क)का डिएसपी बेदप्रसाद गौतमले घटनामा संलग्न भएको आशंकामा १जनालाई तत्काल नियन्त्रणमा लिएर अनुसन्धान थालिएको जानकारी दिए । उनले घटनाका पीडित साहको अवस्था सामान्य रहेको र विवादका विषयमा दुवै पक्षबीच छलफल गराइने बताए । निर्माणाधिन सो सडकका लागि संघीय सांसद एवं पूर्वमन्त्री लालबाबु पण्डितले बजेट विनियोजन गरेका हुन् ।

Featured