NRNA खबर विदेश

७४ दिन लक डाउनपछि मस्को शहर खुल्ला, चहल पहल सुरु

मस्को, जेठ २६–कोरोना भाइरस (कोभिड–१९) संक्रमण रोकथाम तथा न्युनिकरणका लागि लामो समयदेखि रुसको राजधानी मस्को शहरमा जारी लक डाउन आजदेखि खुकुलो पारिएको छ । मस्कोमा विगत ७४ दिनदेखि जारी लकडाउन उच्च सतर्कतका साथ स्थानीय सरकारले आजदेखि खुकुलो पारेको हो ।

मस्कोको स्थानीय सरकारले लक डाउन खुल्ला गरेसँगै आजदेखि पूर्ववतरुपमा बजार, पशल, कार्यालय, शैलुन तथा यातायातका साधन सञ्चालनमा आएको द मस्को टाईम्सले जनाएको छ । मस्कोमा लक डाउन अन्त्य गरिएपनी उच्च सतर्कता अपनाउनका लागि निर्देशन जारी गरिएको छ । उच्च सतर्कताका लागि सामाजिक दुरी कायम गर्न र पञ्जा तथा मास्क अनिवार्य गरिएको छ ।

अबको केही दिन भित्रैं मस्को शहरभित्र रेस्टुरेन्ट, फिल्म हल लगायतपनि सञ्चालनमा आउने जनाइएको छ । लक डाउन खोलिएसँगै राजधानी मस्को शहरमा सामाजिक दुरी कायम र उच्च सतर्कताका साथ चहलपहल सुरु भएको छ । यस अघि सुनसान देखिने सडकमा आजदेखि मानिसहरुको चहल पहल सुरु भएको छ ।

अब रुसका अन्य शहरहरु पनि क्रमश खोलिँदै जाने जनाइएको छ । रुसले कोरोना भाइरसविरुद्धको औषधी प्रयोगमा एकसाता अघिनै स्वीकृती दिएको छ । परिक्षणका क्रममा कोरोना संक्रमितहरुलाई ४ दिनमै निको पारेपछि रुस सरकारले कोरोना भाइरसविरुद्धको औषधि प्रयोगमा स्वीकृति दिएको हो ।

योसँगै अब रुसका अस्पतालहरुमा आगामी केहीदिन भित्र कोरोना भाइरसविरुद्धको औषधि दिन सुरू गरिन लागेको समाचार एजेन्सीहरूले जनाएका छन् । रुसका स्वास्थ्य अधिकारीहरूका अनुसार कोरोना संक्रमितहरुलाई उपचारका लागि आगामी जुन ११ बाट उक्त औषधि दिइने छ ।

रसियन डाइरेक्ट इन्भेष्टमेन्ट फन्ड (आरडीआईएफ) का प्रमुख किरिल दिमित्रेभले रूसका सबै अस्पतालमा रहेका कोरोना संक्रमितहरूलाइ यो औषाधि दिइने बताएको समाचार एजेन्सी रोयटर्सले उल्लेख गरेको छ । यो एन्टिभाइरसको रुपमा विकास गरिएको औषधिको नाम ‘एभिफ्याभिर’ राखिएको छ । कोरोना भाइरसविरुद्धको औषधि अहिलेसम्म कुनै पनि मुलुकले निर्माण गर्न सकेका छैनन् । कतिपय मुलुकले औषधि विकास गरेको दावी गरे पनि प्रयोगका लागि सरकारले अनुमति दिएको छैन।

सम्भवतः कोरोना भाइरसविरूद्धको औषधि प्रयोग गर्न अनुमति दिने मुलुक रुस नै पहिलो बनेको छ । रुसको यो औषधि निर्माता कम्पनीले कोरोना विरुद्ध बनाइएको यो औषधि एक महिनामा ६० हजार संक्रमितलाई पुग्ने गरी उत्पादन गर्ने दाबी गरेको छ । रुसमा मंगलबारसम्म कुल संक्रमितको संख्या ४ लाख ८५ हजार २ सय ५३ पुगेको छ ।

पछिल्लो २४ घण्टामा मात्र रुसमा ८ हजार ५ सय ९५ जनामा कोरोना संक्रमण पुष्छि भएको छ । कुल कोरोना संक्रमित मध्ये ६ हजार ४२ जनाको ज्यान गएको छ । २ लाख ४२ हजार ३ सय ९७ जना कोरोना संक्रमण मुक्त भएका छन् भने हाल २ लाख ३६ हजार ७ सय १४ जना उपचाररत रहेको वल्र्डोमिटरको तथ्यांकमा उल्लेख छ ।

रुसमा बसोबास गर्ने कुनैपनि नेपालीलाई हालसम्म कोरोना भाइरसको संक्रमण देखा परेको छैन । विश्व स्वास्थ्य संगठनको सझाव अनुसार उच्च सतर्कता अपनाएका कारण रुसमा बसोबास गर्ने नेपालीहरु सुरक्षित रहेको जनाइएको छ ।

Featured