देश

यातायात व्यवस्था कार्यालयमा ५ करोडको भ्रष्टाचार, १७ जनाविरुद्ध मुद्दा

काठमाडौं, २५ जेठ-अख्तियार दुरुपयोग अनुसन्धान आयोगले यातायात व्यवस्था कार्यालय सवारी कोशीका तत्कालीन कार्यालय प्रमुख नयराज नेपालसहित १७ जनाविरुद्ध राजश्व हिनामिना गरेको अभियोगमा आज विशेष अदालतमा मुद्दा दायर गरेको छ ।

कार्यालयमा सङ्कलित राजश्व हिनामिना भइरहेको भन्ने उजुरीमाथि छानबिन हुँदा तथ्यगत विवरण, प्रमाण समेतका आधारमा कार्यालय प्रमुखसहितले गैरकानुनी काम गरेको पाइएको आयोगले जनाएको छ ।

आयोगले तत्कालीन कार्यालय प्रमुख नयराज नेपालविरुद्ध १ करोड ८ लाख २९ हजार ६९ रूपैयाँ बराबरको बिगो असुलउपर गर्न माग गर्दै मुद्दा दायर गरेको हो । आयोगले तत्कालीन कार्यालय प्रमुखत्रय तीर्थराज लम्साल ३ करोड ३० लाख ७९ हजार ३७३, गोपाल थपलिया १ करोड ३० लाख ७२ हजार १५३ र भूपेन्द्र राईविरुद्ध ५६ लाख १२ हजार ५४७ बराबरको बिगो असुल गर्न माग गर्दै मुद्दा दायर गरिएको आयोगका प्रवक्ता प्रदीपकुमार कोइरालाले जानकारी दिए ।

यस्तै, लेखा अधिकृत टीकाराम अधिकारी १ करोड २५ लाख ४८ हजार, लेखापाल सुरेश अधिकारी ३ करोड ७२ लाख ४४ हजार ७५५, तत्कालीन लेखापालहरु रुद्रप्रसाद दाहाल ३ करोड ४८ लाख ९३ हजार २१६, अर्जुन भट्टराई २ करोड १७ लाख ३२ हहजार ४७३ र कृष्णप्रसाद कट्टेल ७३ लाख ६२ हजार ४५५ बराबरको बिगो दाबी गरिएको छ ।

यसैगरी कम्प्युटर अपरेटर सुजन राई २२ लाख ४४ हजार ३३६, राकेश रोशन मगर, रमेश पौडेल, भूमिराज अधिकारी र हरिमदन ढुङ्गेलविरुद्ध समान ५ करोड ९४ लाख ९८ हजार ९३१ रूपैयाँ बराबरको बिगो दाबी गरिएको छ ।

कम्प्युटर अपरेटर दीपेन्द्रकुमार मण्डल १ लाख ४६ हजार ५२६ रूपैयाँ, मैयाँकुमारी चापागाईं २२ लाख ४४ हजार ३३६ र रबिनकुमार विश्वासविरुद्ध ४५ हजार ४६१ रूपैयाँ बराबरको बिगो दाबी गरिएको छ ।  रासस 

Featured