विदेश

कोरोना महामारीबीच स्पेनमा विपक्षीद्वारा सरकारविरोधी प्रदर्शन

एजेन्सी, जेठ ११-कोरोना भाइरसको महामारीबीच स्पेनमा सरकारविरोधी प्रदर्शनमा हजारौंले सहभागिता जनाएका छन् । कोरोना भाइरसको महामारी नियन्त्रणमा लिन सरकारले गरेको प्रयास पर्याप्त तथा उपयुक्त नभएको भन्दै विरोध प्रदर्शन भएको हो ।

विपक्षी भक्स पार्टीले देशका प्रमुख सहरहरुमा सामाजिक दूरी कायम गर्दै प्रदर्शनमा सहभागी हुन आफ्ना समर्थकलाई आह्वान गरेपछि हजारौँ मानिस आफ्नो सवारी साधनसहित प्रदर्शनमा सहभागी भएका थिए ।

भक्स पार्टीले सामाजिक दूरी कायम गर्नका लागि कसैलाई पनि सवारी साधनबाट बाहिर ननिस्कन आग्रह गरेको थियो । प्रदर्शनकारीहरुले राजधानी मड्रिडमा कार तथा आफ्ना सवारी साधानमा राष्ट्रिय झण्डा राखेर प्रदर्शन गर्नुका साथै प्रधानमन्त्री पेड्रो सान्चेजको राजीनामा मागेका थिए ।

स्पेनमा कोरोना भाइरसको महामारी नियन्त्रणमा लिनका लागि गत १४ मार्चदेखि कडा लकडाउन लागु भएको थियो । स्पेनमा दुई सातादेखि लकडाउनलाई खुकुलो पार्दै लगिएको छ ।

यद्यपि, राजधानी मड्रिड र बार्सिलोनाजस्ता ठूला सहरमा अझै कडा लकडाउन जारी छ । कोरोना भाइरसको महामारी अझै नसकिएकाले ती सहरमा लकडाउन जारी राखिएको हो । दुवै सहरमा सोमबारबाट अधिकतम १० जनासम्म भेट गर्न पाउने गरी लकडाउन खुला गर्ने तयारी भइरहेको छ ।

प्रदर्शनमा उत्रिएका फार–राइट भक्स पार्टीका समर्थकले लकडाउन पूर्ण रुपमा हटाइनु पर्ने माग गरेका छन् । लकडाउनका कारण मानिसको रोजगारी तथा अर्थतन्त्रमा गम्भीर असर परेको भन्दै उनीहरुले लकडाउन खुलाउन माग गरेका हुन् ।

भक्स पार्टीका नेता सान्तियागो अबास्कालले पूरै विश्वमा स्पेन सरकारले महामारीको खराब व्यवस्थापन गरेको आरोप लगाउँदै प्रधानमन्त्री सान्चेज र उपप्रधानमन्त्री पाब्लो इग्लेसिसलाई राजीनामा दिन माग गरेका छन् ।

Featured