देश

बुटवलको कोरोना विशेष अस्पतालबाट एकै दिन १० जना डिस्चार्ज

बुटवल, १० जेठ-बुटवलको कोरोना विशेष अस्पतालबाट १० जना संक्रमित उपचारपछि निको भएर घर फर्किएका छन् । लुम्बिनी प्रादेशिक अस्पताल बुटवलका कोरोना फोकल पर्सन डा. सुर्दशन थापाले कपिलवस्तुका १० जना निको भएर घर फर्केको जानकारी दिए । ‘साँझ मात्र प्रदेश जनस्वास्थ्य प्रयोगशालाबाट उहाँहरूको रिपोर्ट नेगेटिभ आएपछि घर पठाइएको छ’  उनले भने ।

यसअघि रुपन्देहीका १ जना पनि कोरोना विशेष अस्पतालबाट निको भएर घर फर्केका थिए । शुक्रबार मात्र बाँकेको खजुरास्थित सुुशील कोइराला प्रखर क्यान्सर अस्पतालबाट संक्रमण मुक्त भएर २१ जना घर फर्किएका थिए ।

निको भएर घर फर्केका कपिलवस्तुका १० जना नै लकडाउनको समयमा भारतबाट लुकिछिपी नेपाल प्रवेश गरेका थिए । २ साता अघि कोरोना विशेष अस्पतालमा भर्ना भएका उनीहरूको लगातार २ पटक रिपोर्ट नेगेटिभ आएपछि घर पठाइएको हो ।

त्यस्तै, रुपन्देही गैडहवा गाउँपालिकामा आज संक्रमित देखिएका १० जना मध्ये ७ जनालाई बुटवलको कोरोना विशेष अस्पतालमा भर्ना गरिएको छ । बिहान मात्र गैडहवाका ७ जना र रोहणीका १ जना तथा आजै साँझ गैडहवामा थप ३ जनामा कोरोना संक्रमण देखिएको थियो ।

Featured