देश

सर्वोच्चकी पहिलो महिला न्यायाधीश सुशीला सिंहको निधन

काठमाडौं, १० जेठ-सर्वोच्च अदालतकी पहिलो महिला न्यायाधीश सुशीला सिंह (शिलु)को ८१ वर्षको उमेरमा निधन भएको छ । उनको ललितपुरको नख्खुस्थित नेपाल मेडिसिटी अस्पताल उपचारका क्रममा शुक्रबार निधन भएको हो ।

उनी २०५८ साल वैशाखदेखि २०६३ सालसम्म सर्वोच्चको न्यायाधीश बनेकी थिइन् । उनी महिलातर्फ पहिलो न्यायाधीश, वरिष्ठ अधिवक्ता र सर्वोच्च बारको संस्थापक उपाध्यक्ष पनि भएकी थिइन् । राष्ट्रिय मानवअधिकार आयोगको सदस्य समेत भएकी उनको महिलाको कानुनी सहायता परियोजनामा पनि उल्लेखनीय योगदान रहेको छ ।

उनका श्रीमान इतिहासका जानकार मानिकलाल श्रेष्ठ हुन् । १९९६ साल फागुन २२ गते काठमाडौंको पकनाजोलमा उनको जन्म भएको थियो । उनीका एक छोरा जर्मनीको एक सरकारी अस्पतालमा डाक्टर छन् ।