देश

रतुवामाईले स्थापना गर्‍यो ‘काेरोना भाइरस संक्रमण रोकथाम विपद् कोष’

विराटनगर, १३ चैत-मोरङको रतुवामाई नगरपालिकाले ‘काेरोना भाइरस संक्रमण रोकथाम विपद् कोष’ स्थाना गरेको छ । विश्वव्यापी महामारीको रूपमा देखा परेको कोरोना भाइरस (कोभिड–१९) को सम्भावित जोखिमलाई मध्यनजर गर्दै कोष स्थापना गरिएको हो ।

रतुवामाई नगरपालिकाका मेयर रवीन राई, उपमेयर दयन्तादेवी चुडाललगायत सबै जनप्रतिनिधिबाट सिजुवास्थित राष्ट्रिय वाणिज्य बैंकको खातामा ६ लाख ६३ हजार रुपैयाँ जम्मा गर्दै कोष स्थापना गरिएको मेयर राईले जानकारी दिए ।

उनले रतुवामाई नगरपालिकामा छिमेकी मुलुक भारतबाट नेपाली अत्यधिक संख्यामा भित्रिएको हुनाले सम्भावित जोखिमलाई मध्यनजर गर्दै क्वारेन्टाइन निर्माणका लागि कोष स्थापना गरिएको बताए ।

मेयर राईले विपदको हालको अवस्थामा सम्पूर्ण व्यक्ति, संघ संस्था एवं स्वदेश तथा विदेशमा रहने नगरवासीलाई कोष स्थापना गरिएको राष्ट्रिय वाणिज्य बैंकको सिजुवा शाखाको २५९००००२९३०१ नं. मा सहयोग रकम जम्मा गर्न आह्वानसमेत गरेका छन् ।

‘छिमेकी देश भारतमा कोरोना संक्रमण तीव्र गतिमा फैलिँदै छ । हाम्रो नगरक्षेत्रमा भारतबाट नेपाल आउनेको संख्या धेरै छ,’ उनले भने, ‘क्वारेन्टाइनको अति नै आवश्यकता महसुस गरेर कोष स्थापना गरेका हौँ । उक्त कोषमा सकेको सहयोग गरिदिनुहुन म हार्दिक अपिल गर्दछु ।’

मेयर राईले जोखिम न्यूनीकरणका लागि रतुवामाई–४ स्थित झुर्किया मावि र वडा नं. ८ इटहरास्थित सरस्वती उच्च मावि इटहरामा क्वारेन्टाइन निर्माणको काम अघि बढाएको समेत बताए ।

Featured