देश

सुन्तला बिक्रीबाट वार्षिक ३० करोड आम्दानी

भोजपुर, माघ २८–यस वर्ष सुन्तला बिक्रीबाट ३० करोडभन्दा बढी रकम भोजपुरमा भित्रिएको छ । उत्पादित ४ हजार ७ सय ६ मेट्रिक टन सुन्तला बिक्रीबाट सो बराबरको आम्दानी भएको कृषि ज्ञान केन्द्रले जनाएको छ । गत वर्षको तुलनामा यस वर्ष १० प्रतिशतले सुन्तला उत्पादनमा वृद्धि भएको बताइएको छ । जिल्लामा उत्पादन भएको सुन्तला धनकुटा, सुनसरी, झापा, मोरङ, धरान, इटहरी, विराटनगर, काठमाडौंलगायतका शहरमा जाने गरेको छ । करिब २ करोड मूल्यबराबर आन्तरिक रूपमा खपत हुने र बाँकी अन्य जिल्लामा जाने गरेको केन्दका निमित्त कार्यालय प्रमुख योगन्द्रप्रसाद यादवले जानकारी दिए ।

कार्यालयको तथ्यांकअनुसार गत वर्ष २८ करोड २९ लाख ४४ हजारबराबरको सुन्तला बिक्री भएको थियो । जिल्लामा ७ सय ८८ हेक्टर क्षेत्रफलमा सुन्तला उत्पादनका लागि योग्य जमिन भए पनि हाल ५ सय ८७ हेक्टर क्षेत्रफलमा सुन्तला खेती भइरहेको छ । जिल्लाभर २ सय ८७ ठूला बगैंचा तथा सामान्य रूपमा पनि सुन्तला खेती हुने गरेको केन्द्रले जनाएको छ । अन्य बालीको तुलनामा सुन्तला खेतीबाट बढी आम्दानी र किन्नका लागि ठेकेदार बगैँचामै आउने भएका कारण कृषक सुन्तला खेतीमा आकर्षित हुने बताइएको छ । टेम्केमैयुङ गाउँपालिका–२, छिनामुखुका सुन्तला कृषक सुमन प्रधानले भने, ‘पहिला धरान, इटहरी ढाकार डोकोमा बोकेर सुन्तला बेच्नुपर्ने अवस्था थियो, अहिले बगानमै ठेकेदारको लर्को लाग्छ, थोरै मेहनतमा आम्दानी पनि राम्रो छ ।’

जिल्लाको टेम्केमैयुङ गाउँपालिकाको अन्नपूर्ण, छिनामखु, खावा, कोट, गोगने, तिम्मा, भोजपुर नगरपालिकाको देउराली, हेलौछा, आम्तेक, बोखिम, पालुवा, दावा, हतुवागढी गाउँपालिकाको रानीबास, अरुण गाउँपालिकाको साङपाङ, प्याउली षडानन्द नगरपालिकाको मूलपानीलगायत ठाउँमा सुन्तला उत्पादन हुने गर्दछ । सुन्तला उत्पादन हुने क्षत्रमा प्रदेश तथा केन्द्र सरकारले सुन्तलाको पकेट तथा ब्लग स्थापना गरी कृषकलाई अनुदानको व्यवस्था गरेसँगै यसतर्फ कृषक आकर्षित भएका हुन् । रासस

Featured