देश मनोरंजन राजनीति साहित्य

पश्चिम सेती निर्माणका लागि काठमाडौंमा ‘संगीत संघर्ष’

डडेल्धुरा, माघ २८–७५० मेगावाट क्षमताको पश्चिम सेती जलविद्युत् आयोजना निर्माणको माग गर्दै अभियान चलाइरहेको बोलन्या थली धनगढीले ‘संगीत संघर्ष’ कार्यक्रम आयोजना गर्ने भएको छ । बोलन्या थलीले बहुप्रतिक्षित पश्चिम सेती जलविद्युत् आयोजना निर्माणका लागि दबाब दिन उक्त कार्यक्रम आयोजना गर्न लागेको हो । सोमबार पत्रकार सम्मेलन गर्दै संघर्षको कार्यक्रम अघि बढाउन लागेको बलन्या थलीले जानकारी दिएको छ ।

संघर्षको कार्यक्रम बुधबार दिउँसो ४ बजेदेखि कीर्तिपुरको नयाँबजार गेट मैदानमा हुने बोलन्या थलीका संयोजक यादव जोशीले जानकारी दिए । संयोजक जोशीका अनुसार उक्त संगीत संघर्ष कार्यक्रममा गायक चक्र बम, टंक तिमिल्सिना, अराज केशव, गजलकार विष्णु भट्ट, महेश विसीलगायतका कलाकारको प्रस्तुति रहनेछ । कार्यक्रममा हुड्केली पनि प्रस्तुत गरिने आयोजकले जनाएको छ ।

पश्चिम सेती निर्माणका लागि दबाब दिन आयोजना गरिएको रचनात्मक विरोध कार्यक्रममा सहभागिता जनाउन संयोजक जोशीले सबैमा आग्रह गरेका छन् । कार्यक्रममा प्रवेश निःशुल्क गरिएको छ । यसअघि बोलन्या थलीले पश्चिम सेतीका लागि माइतीघर मण्डलामा कचौरा जुलुस, सुदूरपश्चिमबाट संघीय संसदमा प्रतिनिधित्व गर्ने १३ जना सांसदसँग छलफल कार्यक्रम गरिसकेको छ ।