देश

बझाङमा भालु आतंक, आक्रमणबाट एक महिला गम्भीर घाइते

बझाङ, पुस ७–जयपृथ्वी नगरपालिकाको ७ नम्बर वडामा भालुको आक्रमणबाट एक महिला घाइते भएकी छन् । आज दिउँसो १ बजेतिर जयपृथ्वी नगरपालिकाको कोइरालीखेतमा ४० वर्षकी सितादेवी रोकाया गम्भीर घाइते भएकी हुन् । उनको बझाङ जिल्ला अस्पतालमा उपचार हुन नसकेपछि नेपालगञ्ज रेफर गरिएको सहायक प्रमुख जिल्ला अधिकारी रामबहादुर सार्कीले बताए । घाइते रोकायाको टाउकोको छालासहितको भित्री भाग निक्लिएको उनले बताए ।

उनले जिल्ला डिभिजन वन कार्यालय र गृह मन्त्रालयसँग कुरा भइरहेकाले भालुलाई वनतर्फ धपाउने वा गोली हानेर मार्ने भन्ने कुरा यकिन हुने बताए । भालुलाई नियन्त्रणमा लिन जनशक्ति र स्रोत साधन नहुँदा समस्या भएको हो । एउटा माउ भालु र दुईवटा बच्चासहित तीन भालु एक हप्तादेखि जयपृथ्वी नगरपालिकाका विभिन्न गाउँ पसेर आतंक मच्चाइरहेका छन् । यी तीनवटै भालुले गोठभित्रै पसेर विभिन्न गाउँबाट गरी तीन गोरु मारेका छन् । भालुलाई नियन्त्रणमा लिन नेपाल प्रहरी, वन डिभिजन कार्यालय, सशस्त्र प्रहरी र स्थानीयको टोली खटिएको छ ।

Featured