देश

इथियोपियाली विज्ञद्वारा नवीकरणीय ऊर्जा क्षेत्रको अध्ययन

काठमाडौं, मंसिर २८–नेपालमा नवीकरणीय ऊर्जाका प्रविधि, यसको विकास र विस्तारका लागि लागु गरिएका नीति नियमहरु तथा सरकारी र निजी क्षेत्रको सहभागिताबारे संघीय प्रजातान्त्रिक गणतन्त्र इथियोपियाको एक उच्चस्तरीय प्रतिनिधिमण्डलले बृहत अध्ययन गरेको छ ।

साताव्यापी अध्ययनको क्रममा नेपाल आएको टोलीले वैकल्पिक ऊर्जा प्रवर्द्धन केन्द्रद्वारा सञ्चालित परियोजना, विभिन्न प्रविधिहरुको गुणस्तर मापन र नियमनका लागि गठित नवीकरणीय ऊर्जा परीक्षण केन्द्र, नवीकरणीय ऊर्जा कोष परिचान तथा ग्रामीण प्रविधि केन्द्रलगायत विभिन्न गैरसरकारी संस्था र निजी क्षेत्रले गरेका कामहरुबारे पनि अध्ययन गरेको थियो । ठूला क्षमताका जलविद्युत् परियोजनाहरु निर्माण गरेसँगै नवीकरणीय ऊर्जाका क्षेत्रमा पनि राम्रो प्रगति हासिल गर्न सफल इथियोपियाली विज्ञ टालीको नेपाल भ्रमणले लगानीका अवसर र ज्ञानको आदानप्रदान गर्न सहयोग पुग्ने नवीकरणीय ऊर्जा परिसंघ नेपालका अध्यक्ष गुणराज ढकालले बताए ।

छोटो समयमै नेपालले नवीकरणीय ऊर्जा क्षेत्रमा निकै प्रगति गरेको र यहाँको नीति, सरकारी, गैरसरकारी एवं निजी क्षेत्रको सहभागिता निकै सराहनीय भएको बताउँदै यसबाट आफ्नो देशले धेरै कुरा सिक्न पाएको टोली प्रमुख जलस्त, सिँचाइ तथा ऊर्जा मन्त्रालयका टेसफाए एलेमाएहुले बताए । संयुक्त राष्ट्रसंघीय पुँजी विकास कोष इथियोपियाको आयोजना र नवीकरणीय ऊर्जा परिसंघ नेपालको व्यवस्थापनमा आएको अध्ययन टोलीमा संयुक्त राष्ट्रसंघीय विकास कार्यक्रमका तीन र जलस्रोत, सिँचाइ तथा ऊर्जा मन्त्रालयका १२ जना गरी १५ जनाको सहभागिता थियो । भ्रमण पूरा गरी अध्ययन टोली शनिबार स्वदेश फर्केको छ । (रासस)

Featured