देश

नियम विपरीतका होर्डिङ बोर्ड हटाउन सुरु

काठमाडौं, मंसिर २७–सम्बन्धित संस्था वा व्यक्तिले निर्धा्रित समयमा राखेका विज्ञापन सामग्री (होर्डङ बोर्ड) हटाउने कार्य नगरेपछि काठमाडौँ महानगरपालिकाले सहरलाई कुरूप बनाई राखिएका होर्डिङ बोर्ड हटाउन सुरु गरेको छ । गत सोमबारसम्म कामपाले सम्बन्धित व्यक्ति वा संस्थाले नियम विपरीत राखेका होर्डिङ बोर्ड हटाउन निर्देशन दिएको थियो ।

निर्देशन पालना नगरेपछि अहिले कामपाले बानेश्वर, कोटेश्वर, माइतीघर, त्रिपुरेश्वर, लैनचौरलगायत स्थानका होर्डिङबोर्ड निकाल्ने कार्य गरिरहेको छ । गत मंगलबारदेखि कामपाले उक्त कार्य सुरु गरेको हो । अब कलंकी, सीतापाइला, बालाजु, कालीमाटीलगायतका स्थानमा राखिएका होर्डिङ बोर्ड हटाइने कामपाले जनाएको छ । अहिले पुतलीसडक, बागबजार, बानेश्वर, कोटेश्वर, चाबहिल, कलंकीलगायत स्थानमा नियम विपरीतका विज्ञापन राखिएको कामपाले जनाएको छ । सर्वोच्च अदालतको आदेशअनुसार कामपाले पछिल्लो समय यस कार्यमा सक्रियता देखाएको हो । होर्डिङ बोर्ड, भित्तेलेखन, भित्तामा टाँसिएको पोस्टरलगायत सामग्री नहटाएको भन्दै महानगरपालिकाविरुद्ध सर्वोच्चमा अवहेलना मुद्दा दर्ता भएको थियो ।

कामपाका प्रवक्ता ईश्वर डंगोलका अनुसार हटाउनका लागि अघिल्लो सोमबार सात दिनको समय सम्बन्धित व्यक्ति र संस्थालाई दिइएको छ । तोकिएको समयभित्र नहटाए कामपाले नै हटाउने र कारबाहीसँगै हटाएको ज्यालासहित सम्बन्धित पक्षले दिनुपर्नेछ । नियमअनुसार सार्वजनिक जग्गामा विज्ञापन राख्न नपाइने, झ्याल(ढोका छोपी राख्न नपाइने, विज्ञापन राखेकै भरमा छिमेकीलाई असर पार्न नहुने, सम्पदा भएका स्थानसम्म राख्न नपाइने कानुनी व्यवस्था रहेको छ ।

विसं २०७२ भदौ १६ गते सर्वोच्च अदालतका तत्कालीन प्रधानन्यायाधीश कल्याण श्रेष्ठ र न्यायाधीश ओमप्रकाश मिश्रको संयुतक्त इजलासले सहरका घर, पर्खाल, छत, बिजुलीको पोल र सडकका डिभाइडरमा रहेका पर्चा, पम्प्लेट, भित्तेलेखन, अनधिकृत रूपमा राखिएका होर्डिङ बोर्ड, विज्ञापन बोर्डलाई हटाई पुनः प्रयोग गर्न नदिन आवश्यक निवारणात्मक व्यवस्था गर्न आदेश दिएको थियो । सर्वोच्चले आदेश दिएको चार वर्षसम्म पालना नभएको भन्दै अधिवक्ता पदमबहादुर श्रेष्ठले अदालतको अवहेलनामा कारबाही गर्न हालै रिट दायर गरेका थिए । (रासस)

Featured