देश

चापाकोट देउराली सामुदायिक घरवास सांस्कृतिक महोत्सवको तयारी

पोखरा, मंसिर २४–पोखरा महापालिका-२३ चापाकोटमा यही मंसिर २५ देखि २९ गतेसम्म हुने ‘चापाकोट देउराली सामुदायिक घरवास सांस्कृतिक महोत्सव’ को तयारी अन्तिम चरणमा पुगेको छ । पर्यटकीय दृष्टिले महत्वपूर्ण ठाउँ भए पनि ओझेल परेका कारण चापाकोटको प्रचारप्रसार गर्ने उद्देश्यले महोत्सव आयोजना गर्न लागिएको र सम्पूर्ण तयारी अन्तिम चरणमा पुगेको चापाकोट पर्यटन प्रवर्द्धन समितिका अध्यक्ष भीमप्रसाद पराजुलीले जानकारी दिए ।

पोखराबाट १३ किलोमिटर पश्चिमतर्फ रहेको उक्त ठाउँमा चापाकोट पर्यटन प्रवर्द्धन समिति, चापाकोट देउराली सामुदायिक घरवास र पोखरा महानगरपालिका(२३ ले संयुक्त रूपमा महोत्सव गर्न लागेका हुन् । महोत्सवमा स्थानीय संस्कृति, राष्ट्रिय कलाकारको लोकदोहोरी तथा हास्य कलाकारको प्रस्तुतिका साथै नौमतीबाजा, भजन चुड्का र रत्यौली प्रतियोगिता गरिनेछ । प्रतियोगिताका प्रथम, द्वितीय, तृतीय र सान्त्वना हुने टोलीलाई क्रमशः ३०, २०, १० र ५ हजार रुपैयाँ नगदसहित पुरस्कृत गरिने पराजुलीले बताए । चापाकोट देउराली सामुदायिक घरवास फेवाताल किनार हुँदै ४५ मिनेटको सडकयात्राबाट पुग्न सकिन्छ । पैदलयात्रा गर्दै जाने हो भने घरवास पुग्न करिब अढाइ घण्टा लाग्छ । प्राकृतिक र सांस्कृतिक रूपमा सम्पन्न भए पनि ओझेल परेका चापाकोट, हर्पन, चैनपुरलगायत क्षेत्रको उचित प्रचारप्रसार गर्न महोत्सव गर्न लागिएको हो ।

यहाँका २५ घरमा घरवास सञ्चालन गरिएको र सबैमा महोत्सवका बेला पर्यटक बस्ने व्यवस्था मिलाइएको चापाकोट देउराली सामुदायिक घरवासका अध्यक्ष विश्वराज पराजुलीले जानकारी दिए । तीन सय घर रहेको चापाकोटामा २५ घरमा सञ्चालित घरवासमा करिब १५० पाहुनालाई राख्न सकिने र घरवास बिस्तारै थप्दै जाने योजना रहेको उनले बताए । महोत्सवबाट १५ लाख रुपैयाँ आम्दानी गर्ने र १४ लाख ३० हजार रुपैयाँ खर्च हुने आयोजकको अनुमान गरिएको छ । बचत रकमबाट भ्युटावर निर्माण तथा संस्कृति र स्थानीय झरनाको संरक्षणलगायतका काम थालनी गर्ने योजना राखिएको छ । नेपाल पर्यटन बोर्ड गण्डकी प्रदेशले सघाउने महोत्सवमा स्थानीय लप्सी, तरुल, दमौरा, महलगायत स्थानीय उत्पादनका मात्रै कक्ष राखिने आयोजकले जनाएको छ । (रासस)

Featured