खेलकुद देश

साग उद्घाटनमा प्रयोग गरिएको पटाकाबाट घाइते १० वर्षीय बालकको मृत्यु

जनकपुर, मंसिर २४–जनकपुरधाममा भएको १३औं दक्षिण एसियाली खेलकुद (साग) उद्घाटनका क्रममा छाडिएको पटाका विस्फोट भएर गम्भीर घाइते भएका बालकको उपचारका क्रममा आज मृत्यु भएको छ । कुस्ती खेल भएको जनकपुरधाम उपमहानगरपालिका– १३ स्थित कभर्ड हलनजिकै घर भएका निर्मला राउतका घाइते १० वर्षीय छोरा आलोक राउतको मृत्यु भएको जिल्ला प्रहरी कार्यालय धनुषाले जनाएको छ ।

बालक राउतको धरानस्थित बीपी कोइराला मेमोरियल अस्पतालमा उपचारकै क्रममा मृत्यु भएको धनुषाका प्रहरी निरीक्षक उमाशंकरप्रसाद साहले बताए । २० मंसिरमा कुस्ती खेलको उद्घाटनका क्रममा नपड्केको पटाका बालकले घरमा लगेर खेलाउँदा विस्फोट भएको थियो । विस्फोटबाट पेट फुटेर बालक गम्भीर घाइते भएपछि उपचारका लागि धरान लगिएको थियो । उद्घाटनका क्रममा पटका पड्काउनेहरूको लापरबाहीले बालकले ज्यान गुमाउनुपरेको स्थानीयले आरोप लगाएका छन् ।

Featured