देश

प्रहरीले विद्यालयमै छिरेर विद्यार्थी कुट्यो, विद्यालय बन्द

कोहलपुर, मंसिर २३–बाँकेको कोहलपुरमा स्कुल जाने क्रममा ट्रकको ठक्करबाट एक विद्यार्थी गम्भीर घाइते भएपछि उत्पन्न तनावका कारण सोमबार त्यहाँका विद्यालय बन्द भएका छन् । आइतबार विद्यालय आउँदै गरेकी छात्रा प्रकृति चन्दलाई ना२ख ९४५९ नम्बरको ट्रकले ठक्कर दिएर गम्भीर घाइते भएका बनाएपछि विद्यार्थीहरुले ट्रकमा आगजनी गर्नुका साथै टायर बालेर प्रदर्शन गरेका थिए ।

प्रदर्शनका क्रममा प्रहरीले विद्यालय हाताभित्रै प्रवेश गरेर विद्यार्थीहरुमाथि धरपकड गर्नुका साथै गोली प्रहार गरेको थियो । प्रहरीको धरपकडका क्रममा एक दर्जनभन्दा बढी विद्यार्थी घाइते भएका छन् । उनीहरुको बीएनबी अस्पतालमा उपचार भइरहेको छ । प्रहरी र प्रदर्शकारीबीच झडपका क्रममा १९ जना विद्यार्थी र ४० जना प्रहरी घाइते भएका थिए । घाइतेमध्ये ११ जना विद्यार्थी र १५ जना प्रहरीको अवस्था गम्भीर रहेको छ ।

सो क्रममा विद्यार्थीहरु सुशील थापा, ललित बस्नेत, पूजा मल्ल, विशाल खड्का घाइते भएका छन् । यसैगरी लक्ष्मी कठायत, विक्रम शाह, ललित कटुवाल, महेश आचार्य, चित्रबहादुर रिजाल, अर्जुन परियार, दमन शाही, श्रीकान्त शर्मा, सुनिल थारु, नारायण खत्री, माधव पुलामी, सृजना चन्द र भरत दमाई घाइते भएका छन् । घाइत ११ जनाको काठमाडौंमा उपचार भइरहेको छ भने ३ जना उपचारपछि घर फर्किएका छन् । विद्यालयका तर्फबाट प्रधानाध्यापक देवका बस्नेत थापा र विद्यालय व्यवस्थापन समितिका अध्यक्ष लाल बहादुर रानाले विज्ञप्ति जारी गर्दै विद्यालय हाताभित्र प्रवेश गरेर बर्बर दमन गरेको भन्दै खेद व्यक्त गरेका छन् ।

विज्ञप्तिमा भनिएको छ, ‘विद्यालय शान्ति क्षेत्र हो । बालबालिकाले भयमुक्त वातावरणमा अध्ययनअध्यापन गर्न पाउनुपर्ने नैसर्गिक अधिकारको प्रहरी प्रशासनले खिल्ली उडाएको महसुस भएको छ । बालबालिकामाथि गोली प्रहार गरी मनोवैज्ञानिक त्रास सिर्जना गर्ने दोषीमाथि निष्पक्ष छानविन गरी कडा कारबाहीका लागि जोडदार माग गर्दछौं ।’

Featured