देश

अंग्रेजी नयाँ वर्षमा पोखरामा सडक महोत्सव

पोखरा, मंसिर १८–रेस्टुराँ एन्ड बार एसोसिएसन (रेबान) पोखराको आयोजनामा यही पुस १२ देखि १६ गते (डिसेम्बर २८ देखि जनवरी १ तारेख) सम्म २१ औँ संस्करणको पोखरा सडक महोत्सव हुने भएको छ । ‘सडकमै खाऔँ, सडक रमाऔँ’ भन्ने नाराका साथ प्रत्येक अंग्रेजी नयाँ वर्षका अवसरमा गरिँदै आएको महोत्सवलाई यस वर्ष पनि भव्यताका साथ सम्पन्न गर्ने गरी तयारी गरिएको आज पोखरामा आयोजित पत्रकार सम्मेलनमा रेबानका उपाध्यक्ष एवं महोत्सव व्यवस्थापन मूल समितिका संयोजक लक्ष्मण बरालले जानकारी दिए ।

पोखराको पर्यटकीय गतिविधिलाई चलायमान बनाउन महोत्सव बहुउपयोगी बन्दै गएको बताउँदै उनले अधिकतम संख्यामा स्वदेशी एवं विदेशी पर्यटक भित्र्याउन महोत्सव प्रभावकारी माध्यम बनेको बताए । रेबानका सल्लाहकार गणेशबहादुर भट्टराईले अंग्रेजी नयाँ वर्षमा गरिने पोखरा सडक महोत्सव कास्कीको पहिचानजस्तै बनेको बताउँदै यसलाई सरकारी तवरबाटै राष्ट्रिय महोत्सवका रूपमा अघि बढाउनुपर्ने धारणा राखे ।

पोखरा पर्यटन परिषद्का अध्यक्ष चिरञ्जीवी पोखरेलले सरकारले नेपाल भ्रमण वर्ष २०२० घोषणा गरी २० लाख पर्यटक भित्र्याउने लक्ष्य राखेकामा यस महोत्सवले उक्त लक्ष्य पूरा गर्न सहयोग र्पुयाउने बताए । महोत्सवका अवसरमा नेपालका विभिन्न कला संस्कृति झल्कने सांस्कृतिकलगायत कार्यक्रम हुने पत्रकार सम्मेलनमा जानकारी दिइयो । (रासस)

Featured