देश

पहिलोपटक दुर्गम स्वामीकार्तिक खापर गाउँपालिकाको अर्गा्निक स्याउ सहरतिर

बाजुरा, असोज ९–पहिलोपटक दुर्गम ठाउँमा फलेको अर्गा्निक स्याउ जिल्ला बाहिर काठमाडौँ र धनगढी लगिएको छ । बोटमै स्याउ फलेर कुहिने अवस्था भएपछि कृषि ज्ञान केन्द्र बाजुराले ढुवानी अनुदान दिएर पहिलोपटक जिल्ला बाहिर सहरी क्षेत्रमा स्याउ जान लागेको कृषि ज्ञान केन्द्र बाजुराका निमित्त कार्यालय प्रमुख गोविन्द सिजापतीले बताए ।

किसानका स्याउ बारीमै कुहिने अवस्थामा भएपछि कृषि ज्ञान केन्द्र बाजुराले ६ सय क्विन्टल ढुवानी अनुदानमार्फत बजारसम्म र्पुयाउन सुरु गरेको हो । सहकारी संस्थामार्फत बारीबाट बजारसम्म स्याउ ढुवानी हुन थालेको कृषि ज्ञान केन्द्र बाजुराले जनाएको छ । ढुवानीको जिम्मा सहकारी संस्थाले लिएको नवजीवन सहकारी संस्थाका अध्यक्ष महेश शाहीले बताए ।

पहिलोपटक काठमाडौँमा १ सय क्विन्टल, धनगढीमा ६० क्विन्टल लगिएको छ । बाँकी मार्तडी, कोल्टीलगायतका बजार र्पुयाइने भएको छ । ढुवानी अनुदान पाएको सहकारी संस्थाले नै खरिददेखि बिक्री गर्ने भएको छ । सहकारीले पूर्वउत्तरी क्षेत्र स्वामीकार्तिक खापर गाउँपालिकाबाट ‘ए’ ग्रेडको प्रतिकेजी २५ रूपैयाँ, ‘बी’ ग्रेडको २० रूपैयाँ र सी ग्रेडको १५ रूपैयाँ प्रतिकेजीका दरले खरिद गर्ने गरेको छ ।

त्यस्तै बूढीनन्दा नगरपालिकाको पाण्डुसेनबाट ‘ए’ ग्रेडको प्रतिकेजी ५५ रूपैयाँ, ‘बी’ ग्रेडको ५० रूपैयाँ र ‘सी’ ग्रेडको ४५ रूपैयाँमा खरिद गरेर ढुवानी भएको छ । पाण्डुसैन पुग्न सदरमुकाम मार्तडीबाट करिब ३१ किलोमिटर दूरीमा रहेको छ भने स्वामिकार्तिक खापर गाउँपालिकाको स्याउ उत्पादन हुने ठाउँ पुग्न करिब दुई दिन लाग्ने गर्छ । सदरमुकाम मार्तडीमा भने प्रतिकेजी स्याउको मूल्य १५० रूपैयाँदेखि १८० रूपैयाँसम्म रहेको छ ।

बारीमा स्याउ टन्न फलेको छ, बजार टाढा छ । बारीमा कुहिने अवस्था थियो तर थोरै भए पनि सरकारले यस वर्ष ढुवानी अनुदान दिएपछि पहिलोपटक बाजुराको स्याउ जिल्ला बाहिर जाँदा निकै खुसी भएको स्थानीयवासी शिक्षक गोविन्दबहादुर शाहीले खुसी व्यक्त गरे ।

स्याउको मुख्य भण्डारका रुपमा चिनिँदै आएको जिल्लाका पाण्डुसैन, कोल्टी, जुकोट, जगग्ननाथ, कोटिलालगायतका ठाउँमा स्याउ राम्रोसँग फलेको छ । जसरी स्याउ फले पनि त्यसरी बजार भने पाउन नसकेको किसानले दुःखेसो पोखेका छन् । स्याउकै हाँगा भाँच्चिने गरी फल लागेको भए पनि बिक्री नहुँदा स्याउ किसान भैँसीलाई कुँडो खुवाउन बाध्य हुने गरेको जुकोटका उत्तम शाहीको भनाइ छ । यस वर्ष भने थोरै भए पनि आफ्नै बारीबाट स्याउ ढुवानी भएपछि किसानलाई राहत भएकोमा उनले खुसी व्यक्त गरे ।

बाजुरामा हाल २३० हेक्टर क्षेत्रफलमा स्याउ लगाएको कृषि ज्ञान केन्द्र बाजुराको तथ्यांक छ । जिल्लामा स्याउ १ हजार ५० टन उत्पादन हुने कृषि प्रसार अधिकृत मीनप्रसाद जैसीले बताए । यो वर्ष जिल्लामा स्याउ उत्पादनमा वृद्धि भएको कार्यालयले जनाएको छ ।

यो क्षेत्रमा खाद्यान्न संकट हुने गरेको छ । वर्षभरि काम गरेर खेतको उत्पादनले तीन महिना पनि खान पुग्दैन, बाँकी समय बाहिरको खाद्यान्नमाथि निर्भर बन्नुपर्ने बाध्यता रहेको छ । गाउँसम्म सडकको पहुँच नभएकाले बाजुराका स्याउले बजार पाउन सकेको छैन । (रासस)

Featured