देश

समृद्ध नेपाल,सुखी नेपालीको आकांक्षा पुरा गर्न जीवन उपयोगी शिक्षा आवश्यकता : प्रधानमन्त्री ओली

काठमाडौं, भदौ २२–प्रधानमन्त्री केपी शर्मा ओलीले समृद्ध नेपाल,सुखी नेपालीको राष्ट्रिय आकांक्षा पुरा गर्न जीवन उपयोगी शिक्षाको आवश्यकता रहेको बताएका छन् । ४० औं राष्ट्रिय शिक्षा दिवस तथा ५३ औं अन्तर्रा्ष्ट्रिय साक्षरता दिवसका अवसरमा आइतबार एक शुभकामना सन्देश जारी गर्दै प्रधानमन्त्ती ओलीले सो कुरा उल्लेख गरेका हुन्।

नेपालीका पूर्खाहरुले वैदिक काल देखि नै मान्यजन तथा विद्वत व्यक्तित्वहरुको सानिध्यमा कचहरी,धामिर्क सभा,गुरुकुल शिक्षा जस्ता संस्थाबाट शिक्षाको प्रचार गर्ने गरेको प्रधानमन्त्री ओलीले स्मरण गरेका छन्। ’समृद्ध नेपाल, सुखी नेपालीको राष्ट्रिय आकांक्षा पूरा गर्न विद्वान पुर्खाका सन्तान हामी नेपालीले फेरि ज्ञानगुन, जीवनउपयोगी शिक्षा र नवप्रवर्द्धनात्मक सोचको विकास गर्नु पर्नेछ’ प्रधानमन्त्री ओलीको सन्देशमा उल्लेख छ।

विश्वमा ज्ञानको प्रसार नहुंदै नेपालमा वेदका ऋचाहरुको रचना गरिएको प्रधानमन्त्रीको सन्देशमा उल्लेख छ । ज्ञान भूमीको रुपमा नेपाल जुन गतिमा अघि बढ्नु पर्दथ्यो, विगतका शासकहरुको अदूरदर्शीताले अपेक्षाकृत गति समाउन नसकेको प्रधानमन्त्रीले उल्लेख गरेका छन्।

’ज्ञान भूमिको रुपमा नेपाल जुन गतिले अगाडि बढ्नु पर्दथ्यो, विगतमा शासकहरुको अदूरदर्शीताले अपेक्षाकृत गति समाउन सकेन’ प्रधानमन्त्री ओलीले सन्देशमा भनेका छन्, ’तर अब नेपाल पछाडि परिरहन सक्दैन । नेपाल तीव्र गतिमा अघि बढ्दछ, विकास र निर्माणका लागि अति आवश्यक नवप्रवर्द्धनात्मक सोचको आधारमा जीवनोपयोगी शिक्षाको विकास सरकारको प्राथमिकतामा रहेको छ । ज्ञान, सीप र प्रविधिलाई उपयोग गर्दै आगामी दिनहरुमा नेपालले शैक्षिक स्तर माथि उठाउनेछ।’

शिक्षा प्रणालीलाई रोजगारमुलक र प्राविधिक बनाउनु पर्नेमा प्रधानमन्त्रीको जोड छ। ’हाम्रा शिक्षण संस्थाहरु बेरोजगार उत्पादन गर्ने कारखाना हैन देशका लागि आवश्यक पर्ने दक्ष जनशक्ति उत्पादन गर्ने केन्द्रका रुपमा हुनुपर्दछ’ प्रधानमन्त्री ओलीले सन्देशमा भनेका छन्, ’आधारभूत तहदेखि नै यही लक्ष्य हासिल गर्न सहायक हुने जनशक्ति तयार गर्ने पाठ्यक्रम लागू गरिनु पर्दछ।’ प्रधानमन्त्री ओलीले आगामी दुईबर्षसम्म साक्षर नेपाल घोषणा गर्न सरकार प्रतिवद्ध रहेको पनि उल्लेख गरेका छन् ।

Featured