देश

पोषण एप्सदेखि माटो जाँचसम्म घर आँगनमै

जाजरकोट, भदौ १९–भेरी नगरपालिकाले किसानको घर आँगनमै गएर माटो जाँच गरी सुहाउँदो बाली लगाउन प्रत्साहन गर्ने नीतिलाई यो वर्ष पनि निरन्तरता दिएको छ ।जिल्लाकै सबैभन्दा बढी खेतीयोग्य जमिन र सम्भावना भएको यो नगरपालिकाको समुचित विकास तथा किसानको जीवनस्तरमा सुधार गर्न गुरुयोजना निर्माण गरी कामको थालनी गरिएको नगरप्रमुख चन्द्रप्रकाश घर्तीले बताए ।

व्यावसायिक र आधुनिक कृषिको माध्यमबाट किसानलाई आत्मनिर्भर बनाउने र उनीहरुको जीवनस्तरमा सुधार ल्याउने उद्देश्यले माटो जाँच गर्ने कार्यलाई अभियानका रुपमा अगाडि बढाएको र सोहीअनुसार नयाँ जातको बीउ सिफारिस भएको नगरपालिकाका कृषि शाखाका यज्ञ अधिकारीले बताए ।

पर्याप्त खेतीयोग्य जमिन हुँदाहुँदै पनि किसानका खेतबारी बाँझै हुनु दुःखद भएको बताउँदै उनले यहाँका प्रत्येक किसानलाई आत्मनिर्भर बनाउने र उनीहरुको जीवनस्तरमा सुधार ल्याउन सहयोग र्पुयाउन नगरपालिकाले आवश्यक बजेट र प्राविधिकसहितको टोली गाउँमा खटाएर कामको सुरुवात गरेको नगर उपप्रमुख भावना भण्डारीले जानकारी दिइन् । यो आर्थिक वर्षमा भेरी नगरपालिकाले ६० ठाउँमा नयाँ माटो जाँच गरी सोहीअनुसारको बाली सिफारिस गर्ने योजना अगाडि सारेको पनि उनले बताइन् ।

‘पैसा छरेर मात्र विकासको गति अगाडि बढ्छ भने होइन,’ नगरप्रमुख घर्तीले भने, ‘पहिला किसानले म, मेरा लागि गर्छु भनी आफ्नो आत्मालाई साक्षी राखेर सोच्नुपर्छ, अनि मात्र नगरको लगानीले सार्थकता पाउँछ ।’ त्यस्तै स्वास्थ्य तथा सरसफाइ नीति निर्माण सम्बन्धी छलफल गर्दै नगरपालिकाले प्रत्येक टोलमा स्वास्थ्य शिविर सञ्चालन कार्यलाई चालु आर्थिक वर्षमा पनि निरन्तरता दिएको जनाइएको छ ।

सबै वडामा रहेका स्वास्थ्य संस्थाको स्तरोन्नति र दरबन्दीअनुसार स्वास्थ्यकर्मी परिचालनमा विशेष जोड दिएको नगरपालिकाले आमा र शिशुको पोषणयुक्त खानामा जोड दिएको बताइएको छ ।

नगरपालिकाले बुधबार ‘पोषण एप्स’ सञ्चालनमा ल्याएको छ । नेपालकै पहिलो पोषण एप्स रहेको सो एप्समा नौवटा मेनु रहेको बताइएको छ । भेरी नगरपालिकाको समृद्धिका लागि सबै व्यक्ति मेरो नगर भनेर लाग्नुपर्ने कुरामा समेत जोड दिइएको छ । नगरलाई हरियाली र पर्यटन प्रवर्द्धनका लागि भ्युटावर निर्माणको कामसमेत सुरु भएको नगरपालिकाले जनाएको छ । (रासस)